Кошаркарската репрезентација на Грција обезбеди место меѓу четирите најдобри на Стариот континент, откако вечерва во четвртфиналето ја совлада Литванија со 87-76 и закажа полуфинален дуел со Турција на Европското првенство.

Ова е прв пласман во полуфинале за  Грција по цели 15 години, а воедно и најголем успех на националниот тим во „ерата на Адетокунбо“, кој повторно беше во центарот на вниманието со блескава партија.

Грција имаше контрола врз натпреварот од самиот почеток. Иако Литванците отворија со серија од 7-0, предноста брзо беше анулирана, а до средината на втората четвртина Грција веќе имаше двоцифрено водство (35-24).

Литванија успеа привремено да се врати и да намали на само еден поен разлика до крајот на првото полувреме, но второто полувеме повторно беше во знакот на грчкиот состав, кој во последната четвртина целосно го диктираше темпото.

Јанис Адетокунбо беше најефикасен со 29 поени и 6 скока, додека одлична поддршка доби и од Толиопулос со 17 и Слукас со 11 поени.

На спротивната страна, Јонас Валанчиунас доминираше под кошевите и запиша дабл-дабл учинок од 24 поени и 15 скока, но немаше доволна поддршка од останатите играчи за да спречи ново разочарување за Литванија.

Грција сега го насочува фокусот кон полуфиналниот дуел со Турција, кој ветува вистински балкански спектакл во Рига.