Со претставите „Два квадратни метри“ од Унгарија и „Воздух“ од Словачка заврши тринаесеттото издание на ИДТФ „Битолино“, што се одржа од 3 до 7 август под мотото „Раскажи ми приказна без зборови“ во Битола.

Гран-при наградата ја доби претставата „Големото езеро“ од Португалија во продукција на „Imaginar do Gigante“. Стручното жири беше во состав: претседател Милан Пајиќ, актер од Србија, режисерите Драгана Милошевски-Попова и Благојче Божиновски.

– Претставата ги содржи сите елементи и ги исполнува сите критериуми на современиот театар за деца. Уникатно возбудлива, разиграна, со комбинација на театар на сенки и објекти, но и драматургија која испраќа силна порака, важна и суштинска, која нѐ опоменува и нѐ потсетува на одговорноста која ја имаме преку интеракција и совршена комуникација со публиката. Жирито одлуката ја донесе едногласно – стои во образложението за наградата.

Врз основа на приказна за семејство на поларни мечки, португалскиот театар на публиката ѝ претстави едно уметничко дело за животната средина, со манипулација со предмети, кукли и проектирани сенки.

Театарот „Imaginar do Gigante“ е креативна структура која обезбедува услуги од областа на уметноста и културата. Изведувачките уметности, современи дела за деца и издаваштво на книги за читање се главните области на активност на овој театар. Нивната примарна работа е да истражуваат нови креативни процеси, од текстови до нови слики, во областа на театарската естетика за деца.

За време на Фестивалот во Битола се одржуваше и театарската работилница со наслов „Приказна во движење“ под раководство на пантомимичарот и режисер за пантомима Војо Цветановски, со што „Битолино“ ја продолжи традицијата секое издание на фестивалот да има своја работилница со која преку театар и преку говорот на телото, без употреба на зборови, ќе ги доближат децата до процесот на создавање на еден лик и на една театарска претстава за деца, воопшто.

Фестивалот се одржа на сцените на НУ Центар за култура Битола, а дел од настаните надвор од натпреварувачката конкуренција беа на сцената на НУ Народен театар Битола. ИДТФ „Битолино“ е во организација на „Бабец театар“, а оваа година фестивалот повторно беше проект од национален интерес во културата со финансиска поддршка од Министерството за култура и дел од Годишната програма за култура на Општина Битола за 2024, како и составен дел од програмата на „Бит-фест 2024“.