Граѓаните кои сметаат дека добиле превисоки сметки за струја, може да се жалат, но тоа не ги ослободува од плаќање, велат од „ЕВН хоум“ за „Телма“, откако голем број граѓани реагираа дека за јануари им дошле преголеми сметки.

Кај дел од корисниците, сметките за јануари се и за 50 отсто повисоки од декемвриските, а сметките, како што пишуваше „Слободен печат“, достигнувале и износ колку просечната плата во државата.

„Сите барања за корекции на фактура кои се поднесени од страна на корисниците, посебно се разгледуваат и за нив „ЕВН хоум“ доставува соодветен одговор во рамки на предвидените законски рокови. Поплаката за корекција на фактура не го ослободува корисникот од плаќање, но во случај на спроведување на корекција поради претпоставени вредности во фактурата, овие уплати се земаат предвид. Понатака уплатите се користат за порамнување на идни фактури или му се враќаат на корисникот по негово барање и приложен доказ за уплата“, велат од „ЕВН хоум“.

Регулаторната комисија за енергетика (РКЕ) во петокот му наложи на ЕВН Хоум да ги коригира јануарските сметки и да направи соодветна распределба по блокови согласно историјатот на просечната потрошувачка на домаќинството во последните три пресметковни периоди. Тоа значи дека пресметките треба да бидат прецизни, за да не предизвикуваат преминување на количината на енергија во повисоки блокови за кои и цената на струјата е поскапа.

Од компанијата сега велат дека имаат помалку барања за корекции на фактури за разлика од минатите години.

„ЕВН хоум“, на ниво на територија на целата држава, во јануари 2025 и декември 2024 има добиено околу 18% помалку барања за корекции на фактури во споредба со јануари 2024 и декември 2023“, велат оттаму.

Од РКЕ ги повикуваа потрошувачите кои се незадоволни од пресметката на струја да поднесат приговор до универзалниот снабдувач, а доколку не се задоволни од одговорот на компанијата, имаат право да се жалат и во РКЕ.

Граѓани добиле сметки за струја колку една просечна плата?!