Јавниот повик за аплицирање за субвенционирање на набавка на инвертер клима-уреди што го објави Град Скопје не е затворен, туку во моментов е стопиран. Тоа е причината поради која заинтересираните граѓани не можат да аплицираат за добивање повратни средства, објаснуваат од Град Скопје.

Оттаму велат дека во првиот ден од објавување на јавниот повик, дури 1.800 корисници креирале свое корисничко име за аплицирање поради што дошло до преоптоварување на системот, иако голем дел од нив не успеале да аплицираат за добивање на средства. Проблем настанал и кога дел од заинтересираните граѓани што сакале да бидат сигурни дека апликацијата им е правилно доставена, аплицирале за добивање средства од Градот и по неколкупати. Исто така, причина за стопирањето на јавниот повик за субвенционирање на набавка на инвертер клима-уреди е и поради тоа што со самото аплицирање на 340 заинтересирани граѓани за добивање на средствата, системот автоматски стопирал прибирање нови апликации, објаснуваат градските власти.

– Едни исти граѓани успеале да аплицираат за субвенциите и по неколкупати, а други граѓани иако ги исполнуваат сите услови, не успеале да аплицираат. Во моментов нови апликации не се примаат, бидејќи системот автоматски се стопира по примање 340 апликации. Нашите стручни служби во моментов работат на проверка на присобраните податоци и чистење на списокот на луѓе што аплицирале и по неколкупати, како и на пресметување на преостанатите средства. Доколку се утврди дека има преостанато средства за субвенционирање, односно дека средствата предвидени за таа намена сè уште не се исцрпени, јавниот повик повторно ќе биде отворен, а граѓаните ќе имаат можност да аплицираат – објаснуваат од Град Скопје.

Од Градот објаснуваа дека, за да се знае понатаму кои се чекори ќе бидат преземени, се чека да се состане комисија, која ќе одлучи кои апликации на граѓаните се валидни, колкав процент од оние што аплицирале ги исполниле условите, да го прочистат списокот од граѓаните што аплицирале и по неколкупати и на крај да утврдат дали и колку средства досега биле искористени и дали јавниот повик и понатаму ќе биде отворен.

Додека граѓаните се во исчекување дали повторно ќе се отвори јавниот повик за примање нови апликации за субвенционирање инвертер клима-уреди, од Град Скопје советуваат заинтересираните скопјани да си креираат свои кориснички профили и доколку јавниот повик повторно се отвори, односно доколку анализата утврди дека средствата предвидени за таа намена сè уште не се исцрпени, веднаш да аплицираат за враќање на средствата.

Инаку, Град Скопје огласот за субвенционирање на средствата за набавка на инвертер клима-уреди, го објави во понеделникот.

– На повикот може да аплицираат лица што набавиле инвертер клима-уреди почнувајќи од 1 јануари 2022 година и се жители на Град Скопје (општините Гази Баба, Аеродром, Кисела Вода, Карпош, Чаир, Шуто Оризари, Центар, Ѓорче Петров, Бутел и Сарај) и кои ги исполнуваат предвидените услови. Повикот ќе биде отворен до 1 ноември 2022 година или до денот на исцрпување на средствата. Јавниот повик ќе се реализира по редослед на аплицирање, односно по датум и време на аплицирање и по испратена потврда за предадена печка – стои во објавениот јавен повик на Град Скопје.

Според условите од јавниот повик, граѓаните за да добијат субвенции за инвертери, ќе треба доброволно и без надоместок да ги предадат постојните печки на дрва, јаглен, нафта или мазут. Средствата што Градот Скопје ќе ги субвенционира се во нето-износ не повисок од 62.000 денари.

На Јавниот повик немаат право на учество жителите (домаќинствата) кои имаат станбен објект со приклучок на градско централно греење, без оглед на тоа дали го користат, како и лица што претходно добиле субвенции за набавка на печки на пелети или инвертери.

Документацијата потребна за онлајн аплицирање e достапна на интернет-страницата на Град Скопје www.skopje.gov.mk, а аплицирањето се врши преку платформата uslugi.skopje.gov.mk

Во буџетот на Град Скопје за 2022 година за оваа намена се предвидени 24 милиони денари.

Инаку, овие субвенции се дел од мерките што Градот Скопје ги има предвидено во Планот за подобрување на квалитетот на воздухот и Акциониот план на Стратегијата за климатски промени на Градот.

– По многубројните истражувања за квалитетот на воздухот во Скопје, најголемо учество во емисијата на ПМ10 и ПМ2,5 честичките има затоплувањето на домовите што немаат централно греење. Ова се јавува пред сè поради нецелосното и несоодветно согорување на огревното дрво, лошиот квалитет на дрвото, начинот на неговото чување и употребата на стари, дотраени и технички неисправни печки. Инвертерите за затоплување се економични, еколошки, не користат фосилни горива, а истовремено се ефикасни при затоплувањето на домовите – информираат од Град Скопје.