Основачот на Амазон, Џеф Безос и неговата свршеница, новинарката Лорен Санчез, треба да се венчаат во Венеција на крајот на јуни.

Еден италијански весник неодамна објави дека свадбата на Безос ќе трае три дена и дека на прославите ќе присуствуваат по 250 гости секој ден, меѓу кои би требало да биде и Доналд Трамп. Се шпекулира дека богаташот веќе резервирал пет луксузни хотели, како и импресивен број гондоли и водени такси за превоз на гостите и место за неговата мегајахта.

Но од Градското собрание на Венеција денес е издадено соопштение во кое се осудуваат „лажните вести“ и се демантират информациите дека Безос има намера да приватизира цели делови од градот.

„Бројните шпекулации и лажни вести кои во последно време кружат за свадбата на Џеф Безос се целосно неосновани“, уверуваат од општината. „Поканети се само 200 гости. Затоа, на Венеција ќе ѝ биде лесно да биде домаќин на ваков настан без тоа да биде пречка за градот, неговите жители и другите посетители.“

Од општината посочија дека во Венеција редовно се одржуваат многу позначајни меѓународни настани од ова, од политички самити до познатата Мостра.

Градоначалникот Луиџи Бруњаро ја поздрави одлуката на парот да се венча во неговиот град, а за венецијанското издание на италијанскиот весник „Кориере дела сера“ изјави дека економските придобивки од венчавката би можеле да се бројат во милиони долари.