Со одлуката на градоначалникот на Кан, Давид Лиснар, од 25 јули, се забранува продажба на шишиња со азотен оксид, таканаречен гас за смеење, на сите приватни лица, и возрасни и малолетници, се вели во соопштението на градоначалникот.

Само професионалци од областа на здравството и угостителството се овластени да го купат, и тоа само од 8:00 до 20:00 часот, објавува „Фигаро“.

Шишињата до осум грама за домашна употреба се исклучени од оваа забрана.

Одлуката беше мотивирана од „утврдени повторени нарушувања на јавниот ред и мир“.

Злоупотребата на овој производ делува како дрога, понекогаш предизвикувајќи насилно однесување кај корисниците и сериозни невролошки компликации, предупредува градоначалникот.

Иако продажбата на малолетници е забранета од 2020 година, потрошувачката на гас за смеење брзо расте.

Центарот за управување со отпад „Унивало“ забележа зголемување од 100 отсто на бројот на купени шишиња во последната година.

Само во јули, на јавни места биле собрани 2.800 патрони, според градската администрација на Кан.

Паралелно, градската полиција изрече 192 казни од почетокот на годината.

„Зголемената употреба на азотен оксид како гас за смеење предизвикува многу сериозни проблеми: во областа на јавното здравје, загрозување на безбедноста на другите, загадување на улиците и загрозување на системот за преработка на отпад“, додава Дејвид Лиснар.

Овој гас, кој се консумира преку инхалација, стана водечка причина за миелитис и периферни невропатии кај младите луѓе во регионот Ил-д-Франс.