Група претставници на 165 компании апелираа до Антимонополската агенција на Европската Унија да реагираат на „политиката на „Google“ да ги фаворизира своите пребарувачки услуги на Интернет“.

Меѓу оние што се жалат на монополското однесување на гигант како што е „Google“ се компании од Америка, Велика Британија и компании од уште 21 европска земја, пренесува „Reuters“.

Во заедничкото писмо кое го испратија на шефицата на Антимонополската агенција на Европската Унија, Маргарет Вестагер, тие наведуваат дека „Google“ ги фаворизира своите услуги како сместувања, патувања и други улуги, „со барање да се запрат ваквите практики“.

Претставниците на „Google“ ги отфрлија наведените тврдења и изјавија дека секоја услуга им е достапна на корисниците на Интернет со еден клик, и дека тие не се наоѓаат во никаков „затвор“ да бидат спречени да ги видат сите информации.

Во последните три години, Агенцијата за антимонопол ја казни компанијата „Google“ со вкупно 8,25 милијарди евра за „злоупотреба на моќта на пазарот“.