Охридскиот договор цели кон зајакнување на општествената кохезија и развој на мултикултурното општество, со почитување на етничките идентитети и интересите на сите жители, рече во својот говор в.д. шефот на Мисијата на ОБСЕ во Скопје, Џефри Голдстајн.

Тој учествуваше на тркалезната маса „Важноста на Рамковниот договор за помалубројните заедници“, организирана од Агенцијата за остварување на правата на заедниците и Министерството за политички систем и односи меѓу заедниците, по повод 20 годишнината од потпишувањето на Охридскиот рамковен договор, пренесува „Слободен печат“.

– Во мултиетничко општество е важно помалубројните заедници да може да учествуваат во градењето на политики и донесување на одлуки, посебно кога станува збор за прашања директно поврзани со нивните потреби и остварување на нивните права. ОБСЕ веќе долги години работи со сите релевантни државни институции и невладини организации на заедниците кон промоција, заштита и зајакнување на правата на заедниците. Еден од клучните приоритети е да ѝ се помогне на државата во креирање и имплементација на политики, односно унапредување на правната и институционалната рамка преку која сите заедници може да ги уживаат своите права и активно да учествуваат во сите сфери на јавниот живот – истакна Голдстајн.

Во ова насока во 2012 година, информираше тој,  мисијата на ОБСЕ го иницираше креирањето на партиципативниот форум во кои членуваат претставници на невладините организации и претставниците на државните институции. „Ова е прва платформа која им дава можност на помалубројните заедници да ги искажат своите проблеми и да изготват препораки до државните институции“.

– Продолжувајќи ја нашата долгогодишна соработка во ова област, минатата недела го потпишавме новиот тригодишен договор со Агенцијата за остварување на правата на заедниците. Мисијата на ОБСЕ ќе продолжи да ги поддржува активностите за зајакнување на капацитетите на Агенцијата, невладините организации и на партиципативниот форум – нагласи Голдстајн.