Во текот на зимскиот распуст, на почетокот на јануари, веќе традиционално Кинотеката ја прикажува филмската програма со наслов „Кино Утро“. Оваа година проекциите ќе се одржат од 9 до 18 јануари во киносалата на Кинотеката во Скопје.

Филмската програма „Кино Утро“ содржи играна и анимирана продукција наменета – на најмладите. Кинотека се определи проекциите да се одржат по новогодишните и божиќните празници со прикажување на „Зоки Поки“, македонскиот телевизиски серијал од 10 епизоди.

– Нема двоумење дека најмладите добро знаат што е тоа. Тоа адаптација на нивната омилена лектира, која датира од 1963 година, кога писателката Оливера Николова го објави „зоки Поки“ – истакнуваат од Кинотеката.

Јануари ќе биде надополнет и со анимирани филмови од понова продукција. Најмладата генерација филмофили ќе биде во можност да ги проследи новите авантури на „Нинџа желки: Мутантски хаос“, норвешката продукција „Титина“, германскиот анимиран филм на еколошка тема „Смрдливците – Добредојдовте во Смрдвил“, рускиот филм „Мачки во музејот“, како и македонскиот анимиран филм „Биби и Боби: Пролетна магија“.