Спортскиот директор на Васко де Гама, Фабио Кордеља изјави дека славниот бразилски клуб постигна договор со италијанскиот напаѓач Марио Балотели, кој после заминувањето од Бреша стана слободен играч.

– Балотели сака да дојде кај нас. Васко де Гама е вториот најтрофеен клуб на светот после Реал Мадрид. Мислам дека Марио тука нема да прави глупости, дека тој веќе ја достигна психичката зрелост.

Засега не можеме официјално да го објавиме трансферот, но преговаравме, разменувавме контакти. Сè веќе договоривме, остануваат само формалностите. Се надевам дека до 15 декември ќе потпишеме договор. На клубот му е потребен играч како Балотели, а и на Марио му е потребен клуб каков што е Васко де Гама. За навивачите на нашата екипа тој ќе биде како Марадона – рече Кордеља.

Во својата кариера Балотели играше за екипите на Лумецане, Интер, Манчестер сити, Милан, Ливерпул, Ница, Марсеј.

30-годишниот играч во нападот ги имаше најголемите успеси со Интер, трипати освојувајќи ја Серија А, а по еднаш Купот и Суперкупот на Италија, и Лигата на шампионите. Со Манчестер сити беше по еднаш шампион во Премиер лигата и ФА купот.