Новак Ѓоковиќ обезбеди пласман во финалето на Вимблдон и в недела ќе игра за седмиот трофеј на најпрестижниот гренд слем турнир.

Ѓоковиќ кој е прв носител на Вимблдон, во полуфиналето славеше над Британецот Камерон Нори во четири сета и тоа со 2:6,6:3,6:2,6:4 за нешто повеќе од два и пол часа игра.

Ѓоковиќ кој е актуелен шампион на Вимблдон, в недела ќе игра против Кирјос кој во финалето се пласира без борба бидејќи Рафаел Надал се повлече поради руптура на стомачниот мускул.

Мечот не започна добро за Ѓоковиќ, Британецот уште во првиот гем направи брејк, но Новак експресно возврати. По наредните два мирни гема во тенисерите беа сигурни на свој сервис, Нори успеа да ги казни грешките на Новак и два пати по ред го одзеде сервисот за 2:6 и водство од 0:1 во сетови.

Губењето на првиот сет го разбуди Ѓоковиќ кој почна да игра далеку подобро во продолжение од мечот, беше агресивен во поле и постојано го напаѓаше сервисот на противникот. Таквата игра вроди со плод во осмиот гем кога направи брејк за водство од 5:3 и потоа со сигурен сервис дојде до израмнување на 1:1 во сетови.

Ѓоковиќ продолжи со одлична игра и во третиот сет во кој уште на стартот направи брејк. Потоа уште еднаш го одзеде сервисот на Нори и со убедливи 6:2 поведе со 2:1 во сетови.

И четвртиот сет Ѓоковиќ го отвори со брејк кој на крајот се покажа како одлучувачки за победникот бидејќи беше одличен на свој сервис, не му дозволи ниту една брејк топка на Нори и на крајот славеше со 6:4 што значеше пласман во финалето каде в недела го чека меч со Ник Кирјос.

Ѓоковиќ со пласманот во финалето го помина Федерер и собори нов рекорд