После ждрепката во Букурешт, германската репрезентација се најде во многу незгодна група, за ривали ги има селекциите на Португалија и Франција.

„Групата на смртта“ веднаш беше прогласена, а германските фудбалери кои го освоија првото место во својата квалификациска група „Ц“ не можаат да поверуваат во ваквиот ждреб.

– Навистина не разбирам, како е можно Германија, победникот во својата квалификациска група и светски шампион од 2014 година, да се најде во група со Португалија, која е актуелен европски шампион, и Франција која е актуелен светски шампион? Каква е таа ждрепка и првенство на кое тоа е можно!? – се прашува германскиот репрезентативец, Џошуа Кимих.

Последен пат Германците беа европски шампион во далечната 1996 година кога во Лондон после продолженијата со 2:1 во големото финале ја совладаа Чешка.