Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за најомилениот зимски деликатес во Македонија – ајвар.

– Ајварот е дел од нашата традиција и семејна историја. Овој рецепт ми е пренесен од баба ми, а сега и моите деца знаат како да го подготвуваат. Секое лепче намачкано со ајвар, носи спомени на топли семејни моменти и традиции. Се надевам дека и вие ќе ги откриете убавините на овој класичен рецепт и ќе создадете свои спомени – порачува Бобе.

Состојки:

– 10 кг црвени пиперки
– 700 мл масло за јадење
– 250 мл оцет
– 50 грама шеќер
– сол по вкус

Подготовка:

Пиперките се печат и топли се ставаат во најлон за да се лупат лесно. Кога ќе се изладат, се лупат и се чистат од рачките и семките. Така исчистени се редат во цедалка да се исцедат најмалку три часа. Потоа исцедените пиперки се мелат.

Во длабоко тенџере се сипуваат маслото, оцетот и шеќерот да зовријат, па во нив се ставаат мелените пиперки. Ајварот се пржи околу 30-40 минути со непрекинато мешање. Пред крај се додава сол по вкус.

Топлиот ајвар се става во топли тегли, теглите се затвораат со капаци и се оставаат да се изладат. Потоа се складираат во просторија за чување зимница.

Ајварот не е само деликатес, туку и симбол на заедништво. Подгответе го со љубов и споделете го со вашите најблиски.

На здравје!