Претседателот на Собранието Африм Гаши не знае колку ги чинеше граѓаните патувањето во САД на инаугурацијата на американскиот претседател Доналд Трамп, зашто „тој не се занимава со плаќање авионски билети“. За посетата информирал само преку социјалните мрежи зашто несериозно би било и официјално да информира откако поради временските услови се сменил објектот во кој се одржала инаугурацијата, а тој присуствувал во сала, како на митинг.

Ова накусо е епилогот од посетата на Гаши на САД, за која граѓаните не беа информирани ни преку службената веб-страница на Собранието, ниту преку службената фејсбук-страница на парламентот. За тоа колку чинеше посетата на собранискиот спикер на САД, со кого се сретнал и кои се придобивките за граѓаните од неговиот престој во Вашингтон, Гаши не одговори, туку нè упати да ја искористиме можноста и одговор да побараме преку законот за слободен пристап до информации.

Интересот на „Слободен печат“ за патувањето на Гаши произлезе оттаму што неговата посета на Вашингтон не беше најавена и немаше информации за евентуални средби. Наместо да одговори, Гаши констатира дека немаме капацитет да ја оцениме тежината на посетата на САД.

– Имав официјална покана од комитет за инаугурациски церемонии, лично до мене. Бидејќи требаше да бидам присутен само на церемонијата, сакав да не правиме трошоци, а и поканата стаса во последен момент, и затоа сакав да одам само со едно лице од обезбедувањето. Ниту од кабинетот ниту од протоколот немаше никој со мене токму поради трошоците бидејќи, знаете, колку е поскоро летот, се креваат и цените на авионските билети – рече Гаши на брифингот со новинарите, објаснувајќи детали за посетата на САД.

Кој му кажа аферим на Гаши? Трамп сигурно не

На прашањето зошто се сокриваат информации за патувањето и зошто официјално Собранието ништо не објавило од инаугурацијата на Трамп, Гаши вели дека оцениле оти несериозно е да објават дека присуствувал во сала, што поради мноштвото присутни наликувало како митинг.

– Кога отидовме таму, поради временските услови се смени местото на инаугурацијата и пропадна целиот план. Се одржа во сала каде што влезот беше пристапен за сите граѓани и таму влегоа сите. Ние отидовме таму и кога видовме дека тоа наликува на митинг, испративме само преку социјалните мрежи дека сме таму, дека присуствуваме на инаугурацијата, и тоа беше информацијата. Ништо не кријам, а за сите информации што ги барате, упатете се на Законот за слободен пристап до информации. Бидејќи не отидовме на местото каде што требаше да биде инаугурацијата, кабинетот одлучи дека ќе биде несериозно таква слика или објава да ставиме. Подобро да остане објавата на социјалните мрежи. Не беше скришно и јас не се занимавам со трошоци, ниту плаќам карти. Поканата помина на претседателството на Собранието – рече претседателот на Собранието.

Интересот за посетата која, патем, ја плаќаат граѓаните, собранискиот спикер го спореди со една од точките за неговата интерпелација од пратеничката група на Левица, со цел да ни укаже дека немаме капацитет да ја сфатиме важноста на патувањето.

– Јас сум вчудовиден како може возрасен граѓанин да не сфати што значи официјална посета на самит на НАТО во Вашингтон. Знаете дека имаше пратеничка група што во интерпелацијата за мене за посетата на самитот на НАТО рекоа дека е приватна екскурзија. И за инаугурацијата, за која има официјална покана, ако некој не сфаќа што значи претседател на Собрание да биде поканет и да присуствува на инаугурација на претседател на САД, оставам на совеста и на капацитетите на сфаќање на секој човек. Граѓаните мислам сфаќаат – рече Гаши.

Од посетата на САД, претседателот на Собранието на Фејсбук има само две објави, и тоа дека заедно со премиерот Христијан Мицкоски и со министерот за надворешни работи Тимчо Муцунски присуствувал на средба со заменик-помошникот секретар за Западен Балкан во Бирото за европски и евроазиски прашања, Александар Касаноф, и една фотографија, буквално од улица, со вицепремиерот Изет Меџити и лидерот на Алтернатива, Зеќирија Ибрахими.

Кој плати за фотографирање и прошетка на политичките лидери во САД?