Салата „Борис Трајковски“ се припрема за имунизацијата против ковид -19 која ќе се одвива преку два влеза, точно определена патека на движење, а дневно според проценките ќе се вакцинираат меѓу пет и седум илјади граѓани.

„Слободен печат“ на терен утврди дека веќе се монтирани 24 кабини, кои ќе може да примат и по 48 граѓани одеднаш, бидејќи се поделени со параван и одеднаш во секоја од нив ќе може да се вакцинираат по двајца.

Откако граѓаните ќе се вакцинираат, потоа се упатуваат на столчиња каде што ќе треба да поминат 10 минути на опсервација, а лекарски тим и тимови на итната помош ќе ја следат нивната реакција на вакцината, по што доколку не се јават несакани ефекти ќе можат да се упатат дома.

Наредните два ипол месеци во оваа Арена нема да се одвиваат спортски натпревари. Ракометната, одбојкарската и боречката федерација сите покажале разбирање и своите натпревари ќе ги играат во друга сала.

Во неделата на скопскиот аеродром стигнаа 24 илјади дози од производителот АстраЗенека преку Ковакс механизмот. Дел од нив ќе се администрираат во спортскиот центар Борис Трајковски. Националната техничка група за имунизација против ковид 19 одлучи од почетокот на следната недела да почне вакцинацијата на вработени во критичната државна инфраструктура. Вкупно 4 илјади вакцини ќе бидат издвоени за овие категории граѓани од првичните 24 илјади вакцини кои веќе пристигнаа.

Од Министерството за здравство велат дека во оваа група ќе влезат вработени во МВР кои се најизложени на ризик, потоа вработени во АРМ, новинари вработени во медиуми, вработени во судови и обвинителства, возачи на ЈСП, пожарникари, воспитувачки во градинки и вработени на патарините.

Со оваа одлука, техничката група за имунизација смета дека ќе се заштитат оние вработени кои имаат најголем број контакти и се во голем ризик. Сите останати групи согласно степенот на ризик ќе бидат вакцинирани во последните фази и здравствените власти апелираат за трпение и разбирање.

Вакцината на АстраЗенека е безбедна и со неа ќе се вакцинира и министерот за здравство Венко Филипче, во некоја од подоцнежните фази, кога ќе има голем број на вакцини. Приоритет сега ќе имаат лицата над 75 години кои се пријавиле преку матичните лекари за вакцинација. Тие ќе се вакцинираат и во постоечките пунктови во здравствените домови ширум земјава, каде што се дистрибуирани пристигнатите вакцини.

Погледнете како се одвиват подготовките: