Францускиот суд денеска го ослободи режисерот Роман Полански за клевета, на британската актерка Шарлот Луис, откако таа го обвини дека ја силувал кога била малолетна.

Во 2010 година, Луис (56) изјави дека режисерот сексуално ја злоставувал во неговиот стан во Париз кога имала само 16 години, а отпатувала во француската престолнина на кастинг за филм.

Таа глумеше во неговиот филм „Пирати“ во 1986 година, а го тужеше за клевета откако Полански во интервју за магазинот „Пари мач“ ги окарактеризираше нејзините тврдења како „гнасни лаги“.

Списанието наведува дека Полански го цитирал интервјуто што Луис го дала во 1999 година, во кое таа наводно рекла дека „сакала да биде негова љубовница“ и дека „го сака повеќе отколку тој неа“. Актерката ја оспори точноста на тој цитат, пренесува „Ројтерс“.

Адвокатот на Полански, Делфин Меје, ја поздрави пресудата како „важен ден за слободата на говорот и правата на одбраната“.

„Се чувствувам тажно и разочарано. Тоа е тажен ден за жените и мажите. Но, не е готово. Ќе поднесеме жалба“, изјавила Луис.

Полански избега од Калифорнија во Европа во 1978 година, откако се изјасни за виновен за недозволени сексуални односи со 13-годишно девојче, но пред да биде официјално осуден.

Откако „И јас“ (MeToo) стана глобално движење, по осудата на филмскиот продуцент Харви Вајнштајн за силување, неколку жени јавно изнесоа тврдења дека Полански сексуално ги злоставувал кога биле тинејџерkи. Полански ги негира обвинувањата и никогаш не бил изведен пред суд, но се соочува со тешкотии во филмската индустрија.

Во 2020 година, тој ја освои француската национална награда Цезар за филмот „Офицер и шпион“, што поттикна неколку жени од публиката да ја напуштат церемонијата во знак на протест поради чествувањето на наводниот силувач.