Музејот „Прадо“ во Мадрид ја претстави сликата „Ете го човекот“ (Ecce homo) на италијанскиот барокен мајстор Караваџо, која оваа недела за првпат e прикажана на јавноста, нагласувајќи дека е едно од најголемите откритија во историјата на уметноста. Трагата на оваа слика се губи уште во 19 век, објави „Ројтерс“.

Ремек-делото, денес вреди десетици милиони евра, а се појави на аукција пред три години и речиси беше продадена за 1.500 евра. Шпанија ја блокираше продажбата на сликата, која му се припишуваше на помалку познат шпански сликар од 17 век, откако експертите претпоставија дека тоа е дело на Микеланџело Мериси, попознат како Караваџо.

Професорката по историја на уметност, Марија Кристина Терзаги,  ја следеше трагата на сликата на нејзините претходни сопственици, семејството на политичарот од 19 век, Еваристо Перез де Кастро.

Инаку, Караваџо, кој почина во 1610 година во доцните 30-ти години по турбулентен живот, беше мајстор на светло-темната техника на осветлување наречена „киароскуро“.

„Сега можеме целосно да уживаме во сите нијанси, сите суптилности, огромната убавина што Караваџо ја изразува преку неговата верзија на ‘Ecce Homo’“, изјавил Давид Гарсија Куето, раководител на одделот за италијанско и француско сликарство пред 1800 година во музејот „Прадо“ во Мадрид.

Нејзиниот нов сопственик, меѓународен уметнички колекционер кој живее во Шпанија, потпиша договор со музејот, уметничкото дело да остане изложено до октомври, а договорот може да биде продолжен, бидејќи намерата на сопственикот е сликата трајно да се изложува.

Hoy a las 9.30h se presenta a los medios de comunicación el “Ecce Homo” de Caravaggio, uno de los grandes descubrimientos de la historia del arte, que se podrá ver en el Museo del Prado hasta el 13 de octubre. Se puede seguir en directo en: https://t.co/wW2FVXpnn6 pic.twitter.com/7rl3mSsMSB

— Museo del Prado (@museodelprado) May 27, 2024