Томи Бенкс, сопственик на два ресторани и паб во Северен Јоркшир, Англија, објави дека му е украдено комбето со пити во вредност од 25.000 фунти.

Британскиот готвач чиј ресторан има Мишелин ѕвезда, ги повика крадците кои му го украле комбето со 2.500 пити „да ја направат вистинската работа“, да не ги фрлаат, туку да ги остават некаде за да ги изедат луѓето кои имаат потреба, пишува Би-би-си.

Бенкс во видеото кое го сподели на социјалните мрежи, вели дека „речиси еден тон“ разни пити биле „украдени“ заедно со комбето земено од бизнис паркот „Баркер“ во Мелмерби. Содржината на фрижидерот требала да биде доставена до штанд за пити на божиќен пазар, но во меѓувреме вработените откриле дека комбето исчезнало.

Тој ги повика крадците да ги остават питите во општински центар или пред народната кујна.

„Украдените намирници, во кои имаше различни видови на пити од месо, пиво, брусница или тиквички, би биле доволни да ја снабдат ‘Томис пај шоп’ за една недела“, рекол очајниот готвач.

„Знам дека питите сега ги нема и очигледно нема да ги вратиме за да ги продадеме. Претпоставувам дека крадците не знаеле дека украле 2.500 пити заедно со комбето! Сите тие се во кутии со моето име на нив, така што тие нема да бидат лесни за продажба“, продолжил тој.

„Знам дека сте криминалци, но можеби би можеле да направите нешто убаво затоа што е Божиќ и можеби заедно би можеле да нахраниме неколку илјади сиромашни…направете ја вистинската работа, не дозволувајте храната да оди на отпад. Би било тоа вистинска штета“, заклучил готвачот.

Во видеото, Бенкс побара од секој кој ќе се обиде да продаде пити на некој друг наместо него, да пријави во полиција. Полицијата во Северен Јоркшир соопшти дека биле информирани за кражбата и побарале од сите што имаат какви било информации да контактираат со нив.

 

View this post on Instagram

 

A post shared by Tommy Banks (@tommybanks)