Линдзи Лохан и Џејми Ли Кертис повторно се заедно на големото платно во долгоочекуваното продолжение „Уште пооткачен петок“ (Freakier Friday), кое во кината ќе пристигне на 8 август. Повеќе од две децении по нивниот заеднички успех со филмот „Откачен петок“ (Freaky Friday), двете актерки откриваат дека нивната врска е длабока, искрена и нерскинлива.

Во интервју за списанието „Пипл“, Лохан, која денес има 39 години, зборува за 22-годишното пријателство со Кертис и за тоа колку ѝ значела поддршката во најтешките периоди од животот. „

Џејми беше со мене во време кога јавно минував низ многу турбуленции. Но, таа ми беше тука и приватно, и тоа навистина ми значеше“, вели Лохан, која имала само 17 години кога беше премиерата на „Откачен петок“.

Од друга страна, 66-годишната Кертис изјавува дека во Лохан има целосна доверба.

„Знам дека можам да ѝ верувам. Тоа не можам да го кажам за многу луѓе. Кога ќе ѝ кажам нешто, знам дека таа ќе го задржи тоа за себе. Двете сме поминале низ тешкотии, затоа што животот е тежок. А нашата врска ја надминува целата шоу-бизнис површност“, вели Кертис.

Продолжението „Уште пооткачен петок“ донесува ново поглавје и за филмските ликови: Ана, која ја игра Лохан, сега е мајка на тинејџерка, додека Кертис се враќа како бабата Тес. Снимањето, но и заедничката промоција на филмот, само ја зацврстиле нивната врска.

„Зборот ‘безбедност’ е многу важен за мене, а Џејми ми го дава тој мир. Се чувствувам сигурно кога сум со неа, знам дека можам да ѝ кажам сè“, додава Лохан.

Таа се присети и на важен совет што ѝ го дала Кертис на снимањето пред дваесет години: „Ми рече – начинот на кој доаѓаш на сет го одредува тонот на целиот ден. Тоа ми остана длабоко врежано и отсекогаш го почитувам“.