Во својот четврти натпревар оваа сезона во ракометната ЕХФ Лига на шампионите, во групата А екипата на Еурофарм Пелистер на домашен терен во салата „Боро Чурлевски“ во Битола одигра реми 24:24 (15:13) против Спортинг.

Актуелниот македонски првак одлично го започна мечот пред своите верни навивачи поведувајќи со 2:0, па возвратија Португалците со израмнување.

Во текот на целото прво полувреме играчите на тренерот Бранислав Ангеловски го контролираа резултатот во своја корист.

Воглавно домашниот тим одржуваше позитива од два голови разлика (6:4, 7:5). Иако нешто подоцна, гостите направија серија од 5:2 и дури поведоа минимално со 10:9, по паузата Еурофарм Пелистер беше екипата која имаше предност (15:13).

На стартот од вториот дел составот на Спортинг дојде до нов егал и израмни на 16:16. Еурофарм Пелистер одигра многу подобро во понатамошниот период, врза четири погодоци во низа за 20:16 и наместо да се одржи до крајот ваквата убава предност, се дозволи противникот да возврати со уште поголема мера.

Спортинг направи серија од 6:1 и на семафорот стоеше 22:21 за португалскиот претставник на шест минути до крајот на натпреварот.

Нешто подоцна Португалците имаа и „плус три“, но и покрај ваквата негатива Еурофарм Пелистер не се предаде и со три гола во низа дојде до реми и до својот прв бод сезонава во ЛШ.

Најефикасни кај Еурофарм Пелистер со по пет голови беа Радивојевиќ, Кузмановски и Пешевски.

Следниот дуел во ЛШ „зелено-белите“ ќе го имаат на 17 октомври на гостински терен против Висла Плоцк во Полска.