Жители на улицата „Наум Охридски“ во скопската населба Црниче реагираат до редакцијата на „Слободен печат“ откако машини ангажирани од општина Кисела Вода прекинале кабел за струја, а дел од куќите на улицата останале без напојување со електрична енергија.

Тие се обратиле до ЕВН за да биде отстранет дефектот, но од компанијата им одговориле дека нивните екипи не можат да пристапат и да го поправат скинатиот кабел – токму поради тоа што пречат машините кои го скинале, а сѐ уште стојат на улицата.

Жителите од делот на улицата кој е без струја велат дека не знаат како ќе биде решен нивниот проблем. Тие стравуваат и дека во случај на потреба, до нивните домови поради улицата закрчена со машини, тешко би стигнале амбулантните или противпожарните возила.

Улицата, инаку, е раскопана речиси половина година. Во септември, пред локалните избори, претходната општинска власт ги започнала работите на реконструкцијата, која и новите власти не успеале да ја завршат, велат жителите на „Наум Охридски“ во Црниче.