Голем број холивудски познати личности јавно го поддржаа Џими Кимел откако неговата емисија „Џими Кимел во живо!“ беше суспендирана на неодредено време поради коментар за убиството на конзервативниот активист Чарли Кирк, пишува „Дејли мејл“.

„Еј-би-си“ потврди вчера дека емисијата нема да се емитува „во догледна иднина“, а Доналд Трамп ја пофали одлуката на „Еј-би-си“ на социјалната мрежа Трут соушал (Truth Social).

– Одлични вести. „Шоуто на Џими Кимел“, кое губеше гледаност, е ОТКАЖАНО. Честитки до „Еј-би-си“ што конечно собра храброст – рече Трамп, додавајќи дека Кимел „нема талент“ и има полоша гледаност од Стивен Колберт, а одлуката за откажување предизвика бројни реакции во Холивуд.

Џејми Ли Кертис сподели фотографија од Кимел на својата инстаграм-приказна со порака дека никој не треба да биде „откажан“.

Иам Халси, исто така, предупреди на инстаграм-приказна за опасноста од екстремна цензура, а Алисон Бри ја коментираше ситуацијата како шокантна и застрашувачка.

Многу други познати личности, исто така, се огласија во поддршка на познатиот водител. Комичарката Ванда Сајкс нагласи дека емисијата е ненадејно отстранета поради приговори од администрацијата на Трамп и посочи дека слободата на говорот е сериозно засегната. Покрај тоа, Бен Стилер коментираше дека одлуката за откажување е неприфатлива. Дополнително, Џон Леџенд го критикуваше притисокот врз медиумите.

Чарли Кирк, 31-годишен конзервативен активист и коосновач на Turning Point USA, беше застрелан во вратот на 10 септември додека зборуваше пред публика на кампусот на Универзитетот Јута Вали во Орем, Јута. Во тоа време, Кирк беше на својата турнеја „Американско враќање“, серија говори и дебати организирани од неговата конзервативна организација.

Додека тој зборуваше со член од публиката за масовните пукотници во Соединетите Американски Држави, од покривот на една зграда беше испукан истрел. Истрагите брзо открија дека нападот бил политички мотивиран. Тајлер Џејмс Робинсон, 22-годишниот осомничен, беше уапсен на 12 септември откако неговото семејство го пријави на властите.

Три дена по убиството на Кирк, Џими Кимел се осврна на трагедијата во својот воведен монолог. Неговите забелешки, кои подоцна доведоа до прекин на емитувањето на емисијата, беа остра критика за начинот на кој Трамп и неговите поддржувачи реагираа на убиството.

„Достигнавме нови длабочини во текот на викендот со бандата MAGA која очајно се обидуваше да го окарактеризира ова дете кое го уби Чарли Кирк како нешто друго освен како едно од нив и правеше сè што можеше за да извлече политички поени од тоа“, рече тој.

Кимел, исто така, ја критикуваше реакцијата на Трамп на смртта на човек кого го нарече пријател. Тој покажа снимка од Трамп како зборува за изградбата на теретана во Белата куќа, додека прима сочувство за смртта на Кирк.

– Да, тој е во четвртата фаза на тага – фазата на градење. Ова не е начинот на кој возрасен тагува за убиството на некој што го нарекол пријател. Ова е начинот на кој четиригодишно дете тагува за златна рипка – рече Кимел саркастично.

САД ги укинуваат визите за оние што ја слават смртта на Чарли Кирк