Веќе во неколку наврати пишувавме за градовите на духови. За жал, очигледно ги има повеќе низ целата планета, а ова е приказна за еден таков град кој се наоѓа во Турција.

Градот на замоците наречен Бурџ Ал Бабас во северозападна Турција (во близина на градот Мудурн) првично бил дизајниран да привлече странски гости. Откако биле изградени повеќе од 500 исти вили во форма на замок и биле инвестирани повеќе од 200 милиони евра во проектот, дојде до голем пад на турската економија, пишува „Пункуфер“.

Ситуацијата е таква што денес 587 вили се празни, а Бурџ Ал Бабас го нарекуваат Град на духовите. Иако кулите личат на Дизниленд, тој е далеку од познатиот забавен парк. Пред сѐ затоа што во најпознатиот забавен парк во светот има вечна гужва, а овде – пустош што потсетува на економските неволји во кои се најде земјата.

Проектот започна во 2014 година кога браќата Јерделен и Булент Јилмаз, градежни претприемачи од Истанбул, тргнаа да реализираат амбициозен план. При креирањето на дизајнот, тие биле инспирирани од нивниот роден град. Вилите ги имитираат знаменитостите во Истанбул – кулата Галата и Моминската кула.

Тие исто така избраа добра стратешка локација. Мудурн е добро познато здравствено одморалиште полн со термални извори, па блиските извори во регионот би ги наполниле хидромасажните кади во секој дом и обезбедуваат топлина за подно греење.

Оригиналниот план вклучуваше 700 вили кои се очекуваше да привлечат странски купувачи кои летуваат во Турција поради нејзината медитеранска клима . Куќите се продаваа за по 350 до 500 илјади евра, во зависност од локацијата – цена која одговараше на побогатата клиентела од Блискиот Исток.

Планиран е и трговски центар , заедно со градини и езера низ имотот од 250 хектари. Проектот првично беше успешен. Од планираниот број вили, околу 350 беа продадени на купувачи од Катар, Бахреин, Кувајт, Обединетите Арапски Емирати и Саудиска Арабија.

Но, не беа сите задоволни. Некои локални жители беа фрустрирани што замоците се оддалечија од традиционалната архитектура во отомански стил на Мудурну, додека други беа загрижени дека развојот ќе ги оштети блиските шуми.

Но, имаше земјотрес на глобалниот финансиски пазар, цената на нафтата падна, а многу потенцијални купувачи се откажаа од недвижен имот. Ова, заедно со зголемената инфлација во Турција, политичките превирања и економскиот пад, ги поттикна инвеститорите да поднесат барање за банкрот, прекинувајќи го проектот во 2018 година.

Има 587 завршени домови и околу 30 милиони евра долг. Во 2019 година, на браќата им беше дадена дозвола да ја завршат изградбата на договорните куќи откако им беше поништен налогот за стечај, но пандемијата со корона-вирусот повторно стави сè во мирување.

Целиот проект тогаш беше купен од мултинационална американска корпорација , која ќе се обиде да го спаси овој град, но засега сè уште има редови на напуштени трикатни замоци. Бидејќи инфраструктурата никогаш не била завршена , куќите во моментов се непогодни за живеење.

Денес, напуштениот град привлекува само љубопитни посетители кои сакаат да ѕирнат и да го искусат ова место.