Тригодишното девојче Жив Низан се шетало со семејството во близина на Тел Азека, Израел кога наишло на камче кое му се допаднало. Излегло дека каменот е всушност вистинско археолошко богатство – приврзок од скараби стар 3.800 години.

– Одевме по патот, а потоа Жив се наведна и го зеде овој специфичен камен, од сите камења околу неа. Кога го избриша и го извади песокот, видовме дека камчето е поинакво. Ги викнав моите родители да дојдат да го видат прекрасниот камен, а потоа сфативме дека тоа е археолошко откритие. Веднаш пријавивме сè во израелската управа за антиквитети (ИАА) – рече Омер Никан, сестрата на Жив, во соопштението на ИАА.

Семјон Гендлер, археологот од округот, ги пофали Жив и нејзиното семејство што го пријавиле откритието, и ѝ беше доделена благодарница.

Дафне Бен-Тор, експерт за древни приврзоци и печати, утврдила дека се работи за ханаански скараб од средното бронзено време, што значи дека е стар околу 3.800 години.

– Скарабите во тоа време се користеле како пломби и како приврзоци. Пронајдени се во гробници, јавни згради и приватни куќи. Понекогаш имаат друг симбол и порака, кои укажуваат на нивниот религиозен статус – рече таа.