ФОТО | Триесет години „К-15“: Миле Паника, Тошо Малерот и Цацко Конопишки се враќаат на малите екрани?
Хумористичната емисија „К-15“, кој е значаен дел од македонската поп-култура, наскоро ќе се врати на малите екрани?
Препорачано
Ова е прашање кое многумина си го поставија денеска, откако Бранко Огњановски (Миле Паника) објави фотографија на својот инстаграм-профил, со која најави дека популарната тројка се враќа по повод 30-годишнината од првата сезона на „К-15“.
„Официјално: ‘К-15’ се враќа! Следете нè за повеќе инфо наскоро“, напиша тој на својот инстаграм-профил.
„Слободен печат“ стапи во контакт со Оѓњановски, кој засега не сака да споделува детали за она што тие им го подготвуваат на своите обожаватели.
Да потсетиме, првата епизода на „К-15“ беше емитувана на 23 ноември 1994 година. Духовитите фрази и конверзации на ликовите Миле Паника, Тошо Малерот и Цацко Конопишки бргу станаа дел од популарната култура кај нас, а кратките хумористично-сатирични скечови беа најгледаната програма во сабота навечер.
Создавачите на емисијата, Бранко Огњановски, Васко Тодоров и Љупчо „Бубо“ Каров, ја забавуваа телевизиската публика, но и упатуваа силна социјална, политичка и економска критика, особено за нелогичностите во македонското општество, етничката толеранција, стереотипите и табу-темите.
„К-15“ се емитуваше на повеќе македонски телевизии, меѓу кои А1, Сител, Канал 5, МТВ и Алфа.
Последната епизода беше емитувана на 23 март 2013 година.
