ФОТО | Тони Цетински со емотивна објава за Тоше: Од денот кога си замина, визијата за совршен свет исчезна
Денеска се навршуваат 16 години од смртта на најголемата музичка ѕвезда од Македонија – Тоше Проески. Тој загина на 26-годишна возраст, во трагична сообраќајна несреќа во Хрватска.
Препорачано
Голем број пријатели, соработници и обожаватели на Тоше се присетија на неговиот лик и дело, објавувајќи ги спомени и фотографии со него.
Еден од нив е и хрватскиот пејач Тони Цетински, кој беше близок пријател со „славејот од Крушево“.
Нивната дуетска песна „Lagala nas mala“, која се најде на петтиот студиски албум на Тоше – „По тебе“ (2005), беше еден од најголемите регионални хитови таа година, а се слуша и ден-денес.
Сега Цетински му посвети емотивна објава на својот инстаграм-профил и објави црно-бела фотографија со Тоше.
Драг братко,
Ова се тешки времиња, но не смееме да се предадеме бидејќи ништо не е толку тешко како овие 16 години без тебе.
Денешниот ден е толку тежок што ми е мачно. И, така, секој пат кога се присетуваме на тоа кобно утро откако те нема.
Од денот кога си замина, за нас што те сакавме, визијата за совршен свет исчезна преку ноќ.
Живееме, сакаме, работиме, но ништо не е исто без тебе, мој Тоше. Ништо.
Со тебе, полесно ги поминувавме и тешките мигови. Сѐ беше полесно и сѐ беше возможно.
Знам дека си тука некаде и бдееш над нас, но ни недостасува твојата физичка присутност и твојата насмевка, како и твојот говор и глас. Твојот благ поглед и таа твоја детска игривост во тело на возрасен човек, кој има разбирање за сите.
Често помислувам на тоа дека не можам повеќе, но во истата секунда добивам твој знак. Или ќе слушнам некоја твоја песна или некој ќе ми испрати порака во врска со тебе, која охрабрува и ми дава сила да се подигнам и да тргнам понатаму.
Братко мој, никогаш нема да можеме доволно да ти се заблагодариме и никогаш нема да те прежалиме.
Тажна е секоја годишнина од твоето заминување, тажен е секој ден и секој момент, но мораме да продолжиме да живееме со надеж дека повторно ќе се сретнеме.
Засекогаш твои. Потпишуваме“, напиша Цетински.
