Со марш од порта Македонија до Даре Џамбаз беше одбележан  Меѓународниот ден на мултиплекс склероза (МС).

Маршот, организиран од „Мобилност Скопје“ со поддршка од Националниот сојуз на лицата со телесен инвалидитет на Македонија – МОБИЛНОСТ МАКЕДОНИЈА, има за цел подигнување на јавната свест, борба за остварување на правата на лицата со МС, параплегија и дистрофија и создавање на кохезија во заедницата на еднакви можности.

Претставниците на „Мобилност” ги искажаа нивните барања од областа на социјалната и здравствената заштита.

Министерот за труд и социјална политика по тој повод рече дека предизвици за новата Влада ќе има многу и еден дел од тие работи ги истакнаа претставниците на сојузот.

„Енергијата треба да се насочи кон нивна директна помош и поддршка за одредени работи кои ги барат денеска, а низ годините се нерешени, да тргнеме кон решавање на истите и тоа навистина да се прави со брзи чекори за да им дадеме еден полесен и попристапен начин на живеење”, порача Велковски.

Градоначалникот на Општина Гази Баба, Бобан Стефковски нагласи дека локалната и централната власт мораат да се насочат кон подобрување на условите на лицата со телесен инвалидитет. Тој информира дека во Општина Гази Баба има регистрирано и клуб на лица со телесен инвалидитет кои се натпреваруваат во одредени спортови.

„Континуирани спроведуваме проекти со кои донираме помагала на лицата со телесен инвалидитет. Во рамки на општината изграден е и Дневен центар за лицата со телесна интелектуална попреченост“, рече Стефковски.

Здружението на лицата со телесен инвалидитет „Мобилност“ брои 2.700 членови и постои веќе 36 години.