Пo девет месеци поминати на Меѓународната вселенска станица (ИСС), астронаутите на НАСА, Буч Вилмор (62) и Суни Вилијамс (59) се вратија на Земјата. Иако нивното враќање донесе големо олеснување, експертите предупредуваат дека непланираниот долгорочен престој во вселената може да има сериозни последици по нивното здравје. Исто така, многумина беа изненадени кога видоа колку се променил изгледот на астронаутите, пишува „Дејли мејл“.

Шокантните фотографии пред и по мисијата ги откриваат застрашувачките ефекти што може да ги има продолженото време во вселената врз човечкото тело.

Ослабени мускули

Веднаш по излегувањето од капсулата „СпејсИкс“, медицинските тимови мораа да ги постават на носилки. Ова е стандардна практика за астронаутите по враќањето на Земјата бидејќи нивните ослабени мускули тешко се справуваат со гравитацијата. Кога астронаутите се на Меѓународната вселенска станица нивните тела се бестежински и лебдат во вселената. Поради ова, нивните мускули постепено слабеат.

Иако Вилијамс и Вилмор вежбале најмалку два часа дневно додека биле во вселената, тие морале да се потпрат на колегите додека се качувале на носилката. Истражувањата покажуваат дека престојот во вселената може да ја промени густината на коските на една личност и дека овие ефекти се долготрајни. Дополнително, астронаутите на возраст од 30 до 50 години кои поминуваат шест месеци во вселената губат околу половина од својата сила. Се проценува дека ќе им требаат шест недели да го опорават.

Губење на апетит и отекување на лицето

Астронаутите го губат апетитот за време на престојот во вселената поради притисок во синусите и честото гадење. Лекарите во ноември 2024 година забележале дека Вилијамс изгледала ослабено во септември. Неименуван извор од НАСА за „Њујорк пост“ изјавил дека се прават напори да се стабилизира нејзината тежина и да ѝ се помогне да се здебели. Изворот рече дека Вилијамс не можела да јаде висококалорична храна што астронаутите мора да ја јадат додека се во вселената. Вилијамс ги негираше тврдењата дека ослабела и тврдеше дека добила сила.

Кога човечкото тело е во бестежинска состојба, водата од кое во голема мера е составено циркулира низ организмот многу побрзо. НАСА вели дека преку 5,6 литри вода може да се пренесат од долниот дел на телото во горниот дел од телото. Затоа лицата на астронаутите понекогаш може да изгледаат подуени, а нивните нозе тенки и слаби. Овие нарушувања обично исчезнуваат по три дена на Земјата.

Лош вид и бавно чукање на срцето

Астронаутите може да доживеат и оштетување на видот поради притисокот во нивните глави, што е резултат на водата што циркулира низ нивните тела, а некои пријавиле и намалени когнитивни способности. НАСА вели дека количината на крв во телата на астронаутите може да се намали и нивните срца и крвни садови да работат помалку ефикасно.

Додека се на ИСС, астронаутите се изложени на вселенско зрачење и разни честички. Овие честички ја оштетуваат нивната ДНК и предизвикуваат мутации кои можат да станат рак. НАСА вели дека престојот во вселената може да го зголеми ризикот од рак и кардиоваскуларни болести. Експертите велат дека Вилијамс и Вилмор треба почесто да посетуваат лекари поради тоа.

Исто така, научниците открија дека шест месеци во ИСС може да ја оштетат кожата на астронаутите. Една група научници открила дека нивниот епидермис се разредува за речиси 20 проценти. Друга студија вели дека астронаутите најверојатно ќе страдаат од чешање за време на нивното време во вселената.

Што се случува кога ќе се вратат на Земјата?

НАСА има строга програма за рехабилитација од 45 дена. Тоа вклучува физиотерапија, кардио тренинг и вежби за рамнотежа и сила. Астронаутите ќе мора да тренираат два часа дневно, седум дена во неделата. Целосното закрепнување може да потрае со месеци, а во некои случаи некои ефекти остануваат трајни, особено губењето на коскената маса, изјавиле лекари за „Дејли мејл“.

ВИДЕО | По 9 месеци престој во вселената американските астронаути се вратија на Земјата