Пејачката Ријана го привлече целото внимание на Модните награди во Лондон со својата модна комбинација која во преден план го стави нејзиното бујно деколте. Пејачката се појави во асиметричен фустан од светло сино вештачко крзно со додаток на црн корсет, а целиот аутфит дополнително го зачини со кожени ракавици до лактите и голема светло сина крзнена капа.

На црвениот тепих ја придружуваше нејзиниот партнер, музичарот Асап Роки, кој беше облечен во темносин оверсајз костум, под кој искомбинирал бела кошула и црвена вратоврска.

Како што пишува „Пипл“, двојката е подготвена и за годинешната Мет Гала, кога Роки ќе ги преземе неговите должности како копретседавач покрај Колман Доминго, Луис Хамилтон, Фарел Вилијамс и почесниот претседател Леброн Џејмс. Темата на претстојната Мет Гала е „Superfine: Tailoring Black Style“.

Претходно пејачката откри дека нејзиниот партнер секогаш ѝ помага за модните избори за големи настани, но дека не знае точно какви се плановите за Мет Галата во 2025 година.

„Ништо не ми кажа. Сè што планираме досега е да се појавиме таму. Не се грижам за него, загрижена сум за тоа јас што ќе правам“, изјавила Ријана.