Истрагата за убиството на грчкиот навивач Михалис Кацурис е во тек, полицијата денес разговараше со уапсените хулиганите, а кругот е стеснат на пет лица.

Испитувањето на осомничените ќе се одвива и во наредните два дена, планирано е сите да бидат сослушани до понеделеник, пренесуваат грчките медиуми.

Денес исто така се појави информација дека полицијата поседува снимки од настанот направени од надзорни камери во близина. Во јавноста се објавени и фотографии од овие снимки, на една од нив веројатно е моментот кога е убиен Михалис.

Грчките медиуми пренесуваат дека првата фотографија го покажува моментот кога Михалис е избоден, втората е судирот пред стадионот, додека на третата е групата која наводно го нападнала Михалис.