Поглаварот на Римокатоличката црква, папата Франциск му испрати писмо со сочувство на Абу Бакар, момчето од Сиера Леоне, чија сопруга Фатмата загина кај Гевгелија од полициско оружје на 19 април годинава. Абу Бакар остана во Македонија и е барател на азил, додека во Кривичниот суд Скопје се води судски спор за смртта на неговата жена.

Во писмото кое папата Франциск му го испратил на Абу Бакар на 16 октомври годинава пишува:

„Драг сине Абу, ти благодарам што ми се довери за твоето најтрагично искуство.Ти се придружувам тебе и на целото семејство во жалењето за Фатмата и во барањето правда и мирот кој само Бог може да го даде. Во срцето си ми и во молитвите“, му напиша Папата Франциск на Абу Бакар.

Обвинителството го товари полицискиот службеник од МВР Игор Марков за тешки дела против општата сигурност.

Според Обвинителството, во Гевгелија на 19 април годинава во 6 часот изутрина кај местото викано „стара касарна“ имало насобрано многу луѓе меѓу кои и мигранти кои се обидувале да влезат во возила на криумчарите и да бидат пренесени низ Македонија до друга граница. Полицаецот Игор Марков, знаејќи го тоа и мислејќи дека ќе го онеспособи сега осудениот криумчар на мигранти Кристијан Јанковски – му се доближил од позади додека држел службен пиштол во рацете полн со муниција.

Но, Кристијан нагло се свртел и му се нафрлил на полицискиот службеник, по што овој испукал од службеното огнено оружје, а куршумот завршил во телото на младата Фатмата од Сиера Леоне. Нејзината крајна дестинација според планот кој во судот го раскажа нејзиниот сопруг Абу Бакар – била Франција. Но таа почина во Гевгелија откако беше застрелана.

Полицаецот Марков во судница рече дека не се чувствува виновен за кривичното дело кое му се става на товар и изрази сочувство за семејството и за сопругот на младата Фатмата. Нејзиниот живот заврши на 23 години.

ВИДЕО | Тензично во „Бутел“: Ве молам дајте ми го телото на жена ми за достоен погреб, моли сопругот на убиената Фатмата