Памела Андерсон и Лијам Нисон привлекоа големо внимание на лондонската премиера на филмот „Гол пиштол“ (Naked Gun), каде што актерката му подари нежен бакнеж на образот на својот колега, неколку месеци по неговото јавно признание дека е „лудо заљубен“ во неа, пишува „Индепендент“.

На 73-годишниот актер од „Шиндлерова листа“ (Schindler’s List) му беше видливо пријатно додека со раката ја прегрнуваше 58-годишната Андерсон, која блескаше во лилав фустан без прерамки. Нисон се појави во сив костум со црна маица, со едноставен, но елегантен изглед.

Овој емотивен момент следи по изјавата што Лијам ја даде во октомври 2024 година за списанието „Пипл“, откако заврши снимањето на „Голата пушка“, каде што го глуми синот на ликот на Френк Дребин, а Андерсон е во главната женска улога.

„Со Памела… пред сè, лудо сум заљубен во неа. Таа е фантастична за работа. Искрено, не можам доволно да ја пофалам. Таа е духовита и толку лесна за соработка“, изјави тој тогаш.

Андерсон, која годинава доби пофалби за улогата во драмата „Последната стриптизета“ (The Last Showgirl), возврати со комплимент: „Лијам е вистински џентлмен. Ја изнесе најдобрата верзија од мене“.

Иако нивните изјави беа полни со симпатии и почит, двајцата ги отфрлија гласините за романса. Нисон рече дека е „завршен со состаноци“, а Андерсон изјави дека во него има „пријател засекогаш“.

„Имаме поврзаност која е многу искрена, многу полна со љубов“, додаде таа.

Да потсетиме, Андерсон има богато минато зад себе – била мажена шест пати, двапати за истиот маж. Најпозната е нејзината врска со тапанарот на „Мотли Кру“, Томи Ли, со кого ги има синовите Брендон и Дилан. Потоа следуваа бракови со Кид Рок, Рик Соломан (двапати) и Дан Хејхурст.

Лијам Нисон, пак, беше во брак со актерката Наташа Ричардсон од 1994 година до нејзината трагична смрт во 2009 година, по повреда на глава на часови по скијање во Канада. Таа имаше 45 години.

Новата верзија на култната комедија „Гол пиштол“ е во режија на Акива Шафер. Оригиналната трилогија, создадена од творците на „Авионот!“, беше еден од најголемите хитови на осумдесеттите и деведесеттите години и заработи над 216 милиони долари. Новиот филм премиерно ќе биде прикажан на 1 август, а публиката со нетрпение ја очекува хемијата меѓу Андерсон и Нисон на големото платно.