Ендокринологот доктор Хасан Танер денеска во МАЛМЕД ќе пријави дека лажна терапија „Оземпик“ ѝ била продадена во Косово, на негова пациентка која се лекува од  дијабетес во  ГОБ „8 Септември“. Доктор Танер за „Слободен печат“ вели дека пациентката оваа терапија ја набавила на своја рака во Косово, но се посомневала во нејзината автентичност, поради што дошла да се консултира со докторот и двајцата утврдиле дека станува збор за фалсификат. Фотографиите од лажната терапија и серискиот број ќе бидат доставени до МАЛМЕД. „Оземпик“ во Македонија е во дефицит. Станува збор за лек кој кај лекарите предизвикува дебати дали треба или не треба да се користи за лекување на дебелината, ама некои клинички студии покажуваат дека има ефект. Инаку, станува збор за дијабетна терапија која бројни пациенти во државата без препорака на доктор ја користат и за слабеење и тоа е јавна тајна.

-Многу ги замолувам пациентите со обезност да бидат претпазливи кога купуваат терапија за обезност, особено ако купуваат од Косово. Во прилог се фотографиите од лажен „Оземпик“ кој денеска ми го донесе пациентка. На пенкалото пишува „Оземпик“ ама за жал не е „Оземпик“. Во пенкалото има инсулин. Затоа кога купувате „Оземпик“ задолжително барајте фискална сметка. Исто така, ве замолувам да пријавите во МАЛМЕД за да го евидентираат серискиот број, вели доктор Танер за „Слободен печат“.