Тим археолози откриле гробница на гладијатор закопан таму пред околу 2.000 години. Ова откритие во италијанската провинција Кампанија дава сосема нов увид во историјата на Римската империја, објави канцеларијата на началникот за археологија, ликовни уметности и пејзаж на областа Неапол.

– Во срцето на античкиот Литернум, во неаполската населба Џуљано во Кампанија, продолжија археолошките ископувања во некрополата, тие беа проширени за 150 метри квадратни и недалеку од форумот и амфитеатарот на оваа римска колонија. Под научен надзор на д-р Симона Формоле откриени два оградени гробови украсени со бел и син малтер, бунар, мавзолеј изграден со мрежеста техника и над 20 гробови од различни типови – се вели во соопштението на социјалните мрежи.

Ова покажува дека луѓето живееле во областа помеѓу 1 век п.н.е. и 3 век од нашата ера, што дава значителен увид во погребните обичаи и секојдневниот живот во оваа колонија.

– Меѓу наодите, пронајдени се предмети од гробниот инвентар, натписи на мермерни надгробни споменици, меѓу кои и епитаф на гладијатор, едно ретко и трогателно сведоштво за споменот на овие борци во тогашното општество – се додава во соопштението.

Иако имало жени гладијатори, овој воин бил маж, а неговата возраст, идентитет и точната причина за смртта допрва треба да се утврдат. Ова е уникатен случај бидејќи гробовите на гладијаторите, робови кои се бореле до смрт во арените, се многу ретки.

Во Џуљањо, пред година и половина, беше пронајдена сега познатата гробница на Керберус, наречена така поради ѕидовите и таванот со митолошки претстави, од кои особено е значајна претставата на триглавото куче чувар на пеколот.