ФOTO: Општината штеди, Тетово потона во мрак без јавно осветлување
Повеќе од еден месец е исклучено уличното осветлување на дел од булеварите и улиците во градот, но пред два дена после полноќ Тетово е во целосен мрак без јавно осветлување.
Препорачано
Од Општина Тетово, велат дека гасењето на јавното осветлување е една од мерките за штедење, но наскоро ќе се воведе систем, рестрикциите да бидат плански, се со цел да нема целосен мрак по улиците.
„Една од мерките на Општина Тетово во насока на заштеда на електрична енергија е редуцираното улично осветлување. Се работи на воведување систем кој ќе овозможи плански и регулирано да течат рестрикциите, да бидат опфатени наизменично делови од градот, за да не биде целосен мрак низ улиците“, ни соопштија од Општини Тетово.
Тетовци велат дека целосното гасење на уличното осветлување во градот е премногу ризично.
„Во Тетово како што вели народот е ќора темница, многу е ризично без уличното осветлување, особено од кучињата скитници кои напаѓаат на ден пладне, а сега уште пострашно кога Тетово е во целосен мрак. Додуша ретко кој излегува после полноќ низ град, но младите за викенди излегуваат, има некој оди на работа, некој на доктор, сепак треба да има по некое светло да свети“, вели еден жител на Тетово.
Инаку минатиот месец, Општина Тетово на Седница на совет формираше трговско друштво „Електро Тетово“ за менаџирање на уличното осветлување, кое како што беше посочено би се занимавало со набавка и производство на струја за потребите на јавното осветлување.
Но за неколку дена, владата донесе друга одлука со која им се забрани на општините да формираат претпријатија за јавно осветлуавње. Владината одлука, Општина Тетово ја окарактеризара како незаконска и побара истата да се укине.
Во меѓувреме градоначалникот на Тетово Биљал Касами изјави дека нема да се откаже од намерата претпријатието „Електро Тетово“ да почне да работи. Побарале да се запише и во Централен регистар, ако и таму бидат одбиени, Касами вели дека правдата ќе ја бара преку други институции на системот.
