Огромен транспарент против основачот на „Амазон“ Џеф Безос, чија свадба наскоро треба да се одржи во Венеција, вчера се појави на плоштадот „Свети Марко“ во овој италијански град.

Како што објавија странските медиуми, транспарентот го поставиле активисти на „Гринпис“ од Италија и британската активистичка група наречена „Сите го мразат Елон“ пред свадбата на Безос со Лорен Санчез.

Шестмина демонстранти држеле транспарент со неговата слика и натпис: „Ако можете да ја изнајмите Венеција за вашата свадба, можете да плаќате повеќе даноци“.

Локалната полиција набрзо пристигнала на местото на настанот и го отстранила транспарентот.

Патем, овие протести следеа по други иницијативи против Безос минатата недела, вклучително и транспарент на камбанаријата на базиликата Сан Џорџо и постери поставени низ градот со жалби за претстојната свадба и ефектите од прекумерниот туризам врз Венеција.

Движењето, наречено „Нема простор за Безос“, беше замислено како игра на зборови што се однесува и на неодамнешното вселенско патување на Лорен Санчез.

Активистите велат дека свадбата илустрира поширок неуспех каде што туризмот е приоритет, додека потребите на локалното население се целосно игнорирани. Активистите на „Гринпис“ исто така сакаат да ги истакнат ниските даноци што ги плаќаат многу милијардери, а воедно ја загрозуваат Земјата со неодржлив начин на живот.

Додека градските власти тврдат дека свадбата, чии вкупни трошоци се проценуваат на околу 9,8 милиони евра, ќе донесе финансиски придобивки за градот, советникот од опозицијата Џовани Андреа Мартини истакнува дека обичните граѓани нема да почувствуваат никаква вистинска корист.

Во овој поглед, тој предложи Безос, како трет најбогат човек во светот, да издвои средства за реновирање на повеќе од 1.000 напуштени станови во градот за ублажување на кризата со домувањето.