Интернет порталот „ИМДб“ ( IMDb) ја објави листата на 100-те најголеми актерски ѕвезди кои со својата работа ја одбележаа 2023 година. Овие актери и актерки беа на врвот на топ листите „Старметер“ (STARmeter) и „Мувиметер“ (MOVIEmeter) на „ИМДб“ во текот на годината, кои ја мерат популарноста на филмските ѕвезди и нивните филмови врз основа на погледите и интеракциите што посетителите ги оставаат на нивните страници.

Во продолжение погледнете кои ѕвезди ги зазедоа првите 10 места на листата на „ИМДб“.

1. Педро Паскал

Педро Паскал се најде на врвот на листата благодарение на неговите улоги во хит сериите „The Last of Us“ и „The Mandalorian“. Актерот освои три номинации за Еми за својата работа и помина 13 недели меѓу Топ 10 актери на STARmeter на IMDb. Во иднина ќе го гледаме во филмовите „Drive-Away Dolls“, „Gladiator 2“ и во втората сезона на серијата „The Last of Us“.

2. Мери Елизабет Винстед

Оваа година, Винстед ги воодушеви обожавателите со нејзината улога на Хера Синдула во серијата „Ashoka“, достапна на стриминг платформата Дизни+. Кон крајот на годината, актерката го позајми гласот за анимираната серија на Нетфликс, „Scott Pilgrim Takes Off“, каде што ја повтори улогата од популарната комедија „Scott Pilgrim vs. the World“, со кој се прослави пред 13 години. Идните проекти на актерката се трилерот „Rich Flu“ и мини серијата „A Gentleman in Moscow“.

3. Ана де Армас

Ана де Армас е во првите пет ѕвезди на годишната листа на IMDb од 2020 година. Оваа година нејзината популарност и ја донесоа номинациите за улогата на Мерлин Монро во минатогодишниот филм „Blonde“, а подоцна глумеше покрај Крис Еванс во серијата „Ghosted“. Наскоро ќе можеме да ја видиме во „Балерина“, спин-оф на Џон Вик и во трилерот „Eden“.

4. Џена Ортега

Џена Ортега се најде на листата благодарение на серијата „Wednesday“, во која ја глумеше Венсдеј Адамс и филмот „Scream VI“, во кој ја репризираше улогата на Тара Карпентер. 21-годишната актерка ќе започне со снимање на втората сезона од „Wednesday“ во 2024 година, а ќе се појави во филмовите „Miller’s Girl“ и „Beetlejuice 2“.

5. Бела Ремзи

Младата ѕвезда Бела Ремзи ги воодушеви фановите со нејзината изведба во серијата „The Last of Us“ каде ја глумеше Ели. Идни проекти во кои ќе се појави Ремзи се драмата „Monstruus Beauty“ и втората сезона на „The Last of Us“.

6. Маргот Роби

Роби ја започна 2023 година со номинации за филмот „Babylon“, а ја освои публиката во јули кога се појави во најуспешниот филм за оваа година, „Barbie“, за кој шест недели беше меѓу Топ 10 актери на рангирањето на STARmeter. Следната година, Роби повторно се здружува со Рајан Гослинг, со кого ќе глуми во приквелот на хитот „Ocean’s 11“.

7. Ребека Фергусон

Ја видовме Фергусон оваа година во дистописката серија „Silo“, која беше прикажана на платформата за стриминг на Apple TV+. По хит серијата, таа ја повтори улогата на агентката Илса Фауст во најновиот дел од „Mission Impossible“. Следната година се враќа во улогата на Џесика Атреидс во филмот „Dune: Part 2“. Ќе се појави и во филмот „Mission: Impossible – Dead Reckoning Part 2“, а треба да започне и со снимање на втората сезона на „Silo“.

8. Кејти Сакхоф

Сакхоф, ѕвездата на „Battlestar Galactica“, се најде на врвот на рангирањето на STARmeter откако се појави во третата сезона на „The Mandalorian“ како Бо-Катан. Популарната актерка ќе глуми во научно-фантастичниот филм „The Last Transport“, кој моментално е во продукција.

9. Карла Гугино

Карла Гугино со години работи со режисерот Мајк Фланаган, но многумина велат дека нејзината неодамнешна улога во серијата на Фланаган, „The Fall of the House of Usher“, е една од најдобрите во кариерата на актерката. По премиерата на серијата, Гугино пет недели ги зазема првите места на рангирањето. Актерката следната година ќе ја гледаме во серијата „The Girls on the Bus“ и „Rock, Paper, Scissors“ како и во филмот „Lisa Frankenstein“.

10. Килијан Марфи

Улогата на Марфи во филмот „Oppenheimer“ на Кристофер Нолан го донесе на листата на најпопуларни актери оваа година. Многу критичари ја пофалија неговата изведба, а некои ја предвидуваат и неговата прва номинација за Оскар.