Бутан, тоа мало хималајско кралство сместено помеѓу Индија и Кина, на посетителите им нуди навистина уникатно искуство што тешко може да се најде на друго место во светот, пишува „Путни кофер“.

Од снежните врвови на Хималаите, бујните долини и недопрените шуми, па сè до уникатните фестивали и традиции вткаени во секојдневниот живот на локалното население, оваа неверојатна земја е една од најспецифичните туристички дестинации.

Иако патувањето во Бутан не е ниту едноставно ниту евтино, сите што имале привилегија да го посетат оваа кралство се согласуваат во едно: Бутан нуди непроценливо искуство на духовен мир, природна убавина и културно богатство што остава доживотен белег.

Бутан е земја со богато културно наследство

Длабоко вкоренетото и внимателно зачувано културно наследство на Бутан е еден од најфасцинантните аспекти на оваа хималајска земја. Будизмот го проникнува секој аспект од бутанското општество и делува како негов крвоток. Ова духовно влијание може да се забележи насекаде – од шарените молитвени знамиња што се веат на ветрот до древните манастири сместени на стрмни карпи.

Традиционалната носија, уникатната архитектура и живописните фестивали сè уште се составен дел од секојдневниот живот на локалното население. Посетата на Бутан наликува на патување низ времето, каде што посетителите можат да бидат сведоци на древни традиции кои со гордост и љубов се зачувани.

Бутан се гордее со одржливиот туризам

Кралството Бутан е првата земја во светот што формирала Министерство за среќа, а правото на среќа е запишано и во нејзиниот Устав. Дури и во пописните формулари постои рубрика за оценување на нивото на задоволство од животот. Иако Бутан е една од најнеразвиените земји во Азија, нивната влада верува дека богатството не значи нужно и среќа, па преку разни иницијативи се фокусира на добросостојбата и среќата на своите граѓани.

Во согласност со таа филозофија, Бутан спроведува политика на високовреден туризам со низок импакт, што осигурува дека земјата останува недопрена дестинација, со ограничен број туристи кои го зачувуваат мирот и автентичноста на околината.

Рај за љубителите на природата

Бутан е вистински рај за љубителите на природата, со бујни долини, густи шуми и високи хималајски врвови што одземаат здив. Со речиси 72 отсто од територијата покриена со шуми, Бутан е една од најбогатите области во светот по биодиверзитет. Од суптропските рамнини на југ до алпските предели на север, земјата нуди волшебни пејзажи на секој чекор. Планинарењето, трекингот и набљудувањето на дивиот свет се меѓу најпопуларните начини на кои посетителите можат да се впуштат во природното богатство што го нуди земјата.

„Живејте добри животи, правете добри дела и бидете добри луѓе“

Бутан е совршена дестинација за оние што бараат духовен раст или бегство од брзиот ритам на модерниот живот. Мирната околина, проникната со силното будистичко наследство, создава идеална атмосфера за спокој и медитација. Многу посетители доаѓаат во Бутан за да учествуваат во „медитативни повлекувања“, да посетат древни храмови или едноставно да се нурнат во тишината и хармонијата што ја карактеризира оваа хималајска земја.

Будизмот се смета за една од најмирните и најсреќните религии во светот, заснован на верувањето во кармата. Според будистичкото учење, кармата подразбира дека луѓето што живеат добри животи се поблиску до просветлувањето и дека по смртта се реинкарнираат во подобри суштества. Оваа филозофија ги поттикнува Бутанците да прават добри дела, да бидат љубезни кон другите и да се стремат да бидат подобри луѓе, водени од верата во духовниот напредок и хармонијата.

Образованието и здравствената заштита се бесплатни за сите

И покрај својата скромна економија, Бутан на сите граѓани им обезбедува бесплатно основно образование и здравствена заштита. Образованието во Бутан се смета за основно право и клуч за постигнување на општествени, културни и економски цели на нацијата.

Владата не само што не наплаќа школарина, туку обезбедува и бесплатни материјали и учебници за децата во руралните области. Стапката на писменост значително се зголеми во последните неколку децении, а англискиот јазик се предава во повеќето училишта, што дополнително ја зајакнува иднината на младите Бутанци. Освен тоа, Бутанците имаат бесплатен пристап до основните здравствени услуги во болниците и здравствените клиники низ целата земја.