Во скопската населба Маџир Маало, поточно на улицата Петричка „никна“ нова мини-депонија која со денови целосно го узурпира тротоарот и улицата.

Од фотографиите кои ги доби „Слободен печат“ може да се забележи дека камионче на ЈП „Комунална хигиена-Скопје“ со денови, ако не и недели нема пројдено на оваа локација.

Освен количината на отпадот и нехигиената која владее на овој простор од 15-тина квадратни метри, загрижувачка е и состојбата во која се наоѓа големиот контејнер, кој е скршен и се распаѓа, а според фотографиите, за скоро „му се гледа крајот“ и може целосно да колабира, со што жителите на овој дел од населбата ќе останат и без единствениот контејнер каде можат да го депонираат секојдневниот отпад.

Жителите на населбата бараат итна реакција на комуналците да го соберат и расчистат ова ѓубриште, кое за жал е едно од десетиците кои ги има низ главниот град.