Новата Универзална сала во Скопје ќе ја задржи постоечката форма со цел почитување на колективната меморија, но ќе биде целосно модернизирана со капацитет од 1.200 седишта, современа акустика и нови технолошки системи, најави министерот за култура и туризам, Зоран Љутков, на денешната презентација на проектот.

„Ова ќе биде модерен и функционален објект што ќе го врати значењето на оваа култна локација и ќе ѝ даде нова енергија на културната сцена во Скопје. Универзалната сала ќе стане симбол на културна размена, креативност и заедништво, достапна за сите граѓани,“ изјави Љутков.

Проектот предвидува нова просторна акустика, сценска техника, лед осветлување, аудио-видео и електрични инсталации, како и современи материјали во ентериерот и екстериерот. Планирано е и енергетски ефикасно решение, како и ново хортикултурно уредување.

Според министерот, изборот на изведувач и надзор ќе биде завршен до октомври, а изградбата ќе се реализира по системот „клуч на рака“. Се очекува салата да биде готова до крајот на 2027 година, со што во 2028 ќе може да ја пречека програмата за „Скопје – Европска престолнина на културата“.

Инвестицијата се проценува на 20 милиони евра.

Проектантот Бујар Муча појасни дека е задржан концептот на гледалиштето и влезовите, но бројот на редови е намален за поголем комфор и безбедност.

„Со 1.200 седишта наместо 1.500, салата ќе биде пофункционална и ќе ги исполнува сите безбедносни стандарди,“ истакна Муча.

Новата Универзална сала, како што најави министерот,  ќе може да биде домаќин и на филмски премиери, при што подобрената акустика ќе гарантира дека нема да им пречи на жителите од околината.

По завршувањето на проектот, објектот повторно ќе премине под надлежност на Град Скопје.