Македонската уметница и планинарка Илина Арсова денеска го прославува својот 43. роденден, а по тој повод таа објави серија фотографии од себе од најразлични фази и достигнувања во животот.

На фотографиите ја гледаме Илина како планинари, на отворање на изложба, на медиумски гостувања, и секако онаму каде што најубаво се чувствува – во природа.

„Кога ќе пораснам, сакам да бидам јас“, напиша таа покрај фотографиите.

Арсова е родена на 31 јули 1982 година во Скопје. Основното и средното образование ги завршила во Скопје, а во 2005 дипломирала на Факултетот за ликовна уметност на Универзитетот Св. Кирил и Методиј во Скопје, во класата на Рубенс Корубин и Јован Шумковски.

Во 2005 станува член на Друштвото на ликовни уметници на Македонија, а преку уметноста подолго време ги претставува загадувачките навики и човековите интервенции врз природата, обидувајќи преку визуелен креативен израз да допре и делува врз подигнување на еколошката свест кај народот. Во 2008 година магистрирала на Јазици, бизнис и меѓународна трговија на Универзитетот Св Кирил и Методиј и Универзитетот Орлеан (Франција). Како ликовен уметник реализира над десет самостојни изложби во Македонија и во странство, а учествува на истакнати групни изложби и биеналиња.

Од 2006 година почнува посериозно да им се посветува на планинските спортови (планинарење, алпинизам, слободно скијање, летање, качување по карпи и планински велосипедизам). Истата година за првпат се искачува на Монблан (4.810 метри), највисок врв во западна Европа, како дел на екипата на црвениот крст за итни интервенции и спасување во планина. Во периодот од 2006-2016, Илина Арсова успева да искачи пет од седумте највисоки врвови, на 5 различни континенти. Во 2013, по повеќемесечна подготовка, Илина Арсова станува првата жена Македонка која се искачува на Монт Еверест.

Во 2020 година ја доби наградата „13 Ноември“ од областа на спортот за искачување на 7-те највисоки врвови на 7 континенти. Оваа година Арсова, докторираше на универзитетот во Ноксвил, Тенеси.