По повод 75 години од основањето на Фото-кино клуб „Козјак“ од Куманово на 20 декември, со почеток во 18.30 часот, во Занаетчиски дом во Куманово ќе се одржи централниот настан кој ќе донесе богата програма со проекција на филмови, изложба на фотографии, презентација на награди и признанија, како и проекција на дијапозитиви кои се создадени во текот на изминатите години. Покровители на настанот се Министерството за култура и Општина Куманово, а истиот е под патронат на Фото Сојуз на Македонија.

– Фотографијата истовремено е уметност, наука и практика, која ја има таа моќ да раскажува приказни преку боите, мигновените изрази на лицето и телото, пејзажите, движењата и емоциите фотографирани и ставени во рамка. Иако строго визуелна по дефиниција, нејзината порака се чита со сите сетила и допира до секоја емоција. Благодарение на фотографијата, произлегува нова форма на култура која претставува комуникација од движечки карактер кој заедно со звук раскажува најразлични приказни и им помага на луѓето да научат нови идеи. Форма на култура позната како филм.

Една ваква уметничка презентација на светот гледан низ објектив претставуваат и овогодишните манифестации на Фото-кино клуб „Козјак“ по повод јубилејните 75 години од основањето. Публиката ќе има можност да види фотографии, филмови, мигови од реалноста, специфичен вид на сведоштва за она што, низ уметничката перспектива на нашите членови, значи да се биде ОВДЕ и СЕГА.

Овие манифестации имаат за цел да го презентираат и надополнат естетскиот сенс за уметничката фотографија и филм, кој го гради нашиот клуб повеќе од половина век. Изложените дела се показател на сериозноста и посветеноста со која ѝ пристапуваме на оваа уметност и претставуваат уште еден доказ за оправданоста на интернационалното реноме кое го има ФКК „Козјак“ – истакнува Марјана Павличек, претставник на ФКК „Козјак“ – Куманово.

По повод своите јубилејни 75 години ФКК „Козјак“ оваа година организираше низа настани. Сите љубители на фотографија и филм имаа и ќе имаат можност да уживаат во уметнички дела создадени со љубов и макотрпна работа во изминатите години од страна на членовите на ФКК „Козјак“.

Првиот настан беше со наслов „Мајски салон 2023“, кој е и традиционална клубска изложба на ФКК „Козјак“. Во склоп на салонот посетителите имаа можност да видат уште една изложба на уметничка фотографија насловена „Различни погледи“ од членовите на збратимениот Фото клуб „Марибор“ од Словенија.

Како следен настан беше Меѓународниот фестивал на краток филм „Филмај 2023“, кој веќе пет години по ред се одржува и на истиот оваа година земаа учество автори од 45 земји со 196 филма, a беа доделени наградата „Лазар Ѓорѓевиќ“ за најдобра режија, наградата „Радислав Ристевски“ за најдобра фотографија/кинематографија, наградата „Козјак“ за најдобро сценарио и наградата „Филмај“ за најдобар филм.

Како трет настан беше традиционално организирана најстарата меѓународна изложба во Македонија, „Фото Салон 2023“. Сѐ започна во 1962 година, најпрвин како клупска подоцна како меѓуклупска изложба, односно меѓурепубличка, а во последниве неколку години „Фото Салон“ прерасна во една од најпочитуваните и најпосакуваните изложби меѓу авторите од државите ширум светот. На овогодишниот натпревар учествуваа 115 автори од целиот свет и на истата беа доделени 25 награди во Слободна категорија и Главна награда за најдобар автор на изложбата.

Како последен настан за оваа година, можеби и најзначаен за историјата и творечките дејности на ФКК „Козјак“, ќе биде централната свеченост на 20 декември во Занаетчиски дом во Куманово.

– За жал, фотографијата како уметничко изразување во Македонија е, помалку или повеќе, пасија на ниво на хоби, организирана во повеќе фото-клубови ширум државата. Но, дури и како таква, таа побудува сѐ поголем интерес кај младите што резултира со дела кои го збогатуваат квалитетот на македонската фотографија и сѐ повеќе ги истакнуваат нејзините специфики. Токму како поддршка на креативноста на младите и неафирмирани фотографи, но и како презентација на оние наши членови чии имиња и дела се веќе препознатливи во светот на уметничката фотографија, ФКК „Козјак“ оваа година слави 75 години од своето постоење – додава Марјана Павличек од ФКК „Козјак“ – Куманово.