Пожарите во Лос Анџелес оставија неколку десетици илјади луѓе без покрив над главата, меѓу кои и многу познати луѓе. Почнаа да се организираат хуманитарни акции за оние на кои им е најпотребно, но меѓу многуте добри луѓе има и измамници, а една од нивните жртви е и Ким Кардашијан.

Таа ги предупреди своите следбеници на Инстаграм да не наседнуваат на лажните мејлови кои се појавија деновиве. Имено, некој се претставува под нејзиното име и бара од луѓето да „донираат пари“ со јавување на одреден телефонски број. “Пазете се од измамници! Ако некој го добие овој мејл со моето име на него, тоа не е реално. Колку е страшно”, напишала Ким, пренесува „Мирор“.

Лажниот мејл, насловен како „Кампања на Ким Кардашијан за погодените луѓе во Лос Анџелес“, кој бил преполн со грешки, гласел вака: „Почитувани, ова е Ким Кардашијан, се надевам дека ви оди одлично? Ви благодарам што ме поддржувавте. Сакам да обратиме внимание на неодамнешниот инцидент во Лос Анџелес со избувнувањето на пожарите, ве молам сакам да ја одиграме нашата улога помагајќи им на засегнатите, знаете дека не можам да го сторам тоа сама и затоа ве имам сите како фанови, семејство и поддржувачи, кои можат да дадат поддршка со која било сума“.

Тоа доаѓа откако Ким ги пофали напорите на пожарникарите кои се борат со пожарите. Таа претходно напиша: „Ја поминав последната недела гледајќи го мојот град како гори. И видов и разговарав со многу пожарникари кои се будни цела ноќ, користејќи го секој дел од својата сила за да ја спасат нашата заедница. Ви благодариме @calfire la County Fire и на Los Angeles City Fire за сè што правите за да спасите животи, домови и имот“.