Научниците ја решија мистеријата на човек роден пред 2.000 години во Русија, кој бил погребан во Велика Британија, сето тоа благодарение на ДНК, пишува „Би-би-си“.

Лондонскиот институт „Френсис Крик“, Универзитетот „Дурам“ во Англија и конзорциумот од две британски археолошки компании, работеа заедно за да ја утврдат историјата на скелетот пронајден во 2017 година. Истражувањата покажаа дека скелетот кој бил пронајден во Кембриџшир е на човек од номадската група позната како Сармати.

Ова истражување е детективска приказна која користи најсовремена форензичка наука за да ја разоткрие мистеријата на обичен млад човек. Мажот познат како Офорд Клуни 203645 бил закопан во близина на рурална фарма во Велика Британија, но наодите велат дека тој дошол илјадници километри подалеку.

Тој е првиот биолошки доказ дека Сарматите дошле во Британија од најоддалечените краишта на Римската империја и дека некои од нив живееле во руралните средини.

ДНК анализата е спроведена како дел од проектот за антички геноми во Велика Британија, предводен од античката геномска лабораторија при Институтот „Френсис Крик“.

Марина Соарес де Силва, постдокторски соработник кој истражува во лабораторијата, во соопштението од институтот вели дека таа и нејзините колеги истражувачи „почнале со екстракција и секвенционирање на античката ДНК од коската на внатрешното уво на поединецот“, истакнувајќи дека тоа е место кое било најдобро зачувано. Таа објасни дека ова не е како да се тестира ДНК на некоја жива индивидуа.

„Античката ДНК е многу фрагментирана и оштетена“, рече Соарес де Силва,

Но, тимот успеа „да секвенционира доволно од неговата ДНК за да добие добар квалитет“ и да ја спореди со други примероци на древни индивидуи.

„Првото нешто што го видовме е дека генетски тој е многу различен од другите римско-британски поединци кои досега ги проучувале. Всушност, нашата анализа покажа дека тој имал заеднички предци со претходно проучувани поединци од кавкаските и сарматски групи“, рече Соарес де Силва.

Според истражувањето, Сарматите биле номадски народ кој зборувал ирански и биле познати јавачи на коњи кои живееле во областа што ќе стане денешна Јужна Русија и Украина.

Сепак, само ДНК тестот не може да потврди точно каде е роден мажот, бидејќи неговите родители можеле да се преселат во областа пред тој да се роди.

Истражувачите почнаа да се фокусираат на други видови анализи, а експертите од Катедрата за археологија на Универзитетот во Дурам ги анализираа изотопите од забите на човекот за да видат каде пораснал и како неговата исхрана можеби се променила во текот на неговиот живот.

Научниците откриле дека човекот „живеел на сушна локација на истокот на континентална Европа“ до својата 5 или 6 година. Неговата исхрана на таа возраст се фокусирала на култури како „просо и сорго, кои не се одгледувани во Европа.

Историските записи покажуваат дека човекот именуван Офорд би можел да биде син на коњаник, или можеби негов роб. Тие покажуваат дека околу времето кога тој живеел, единица на сарматската коњаница вклучена во римската војска била испратена во Британија.