Дино Мерлин живее во куќа во сараевската населба Алифаковац, која на прв поглед изгледа скромно и ненаметливо, слична на околните домови. Терасата на куќата е оградена, обезбедувајќи му дополнителна приватност, пишува „Вечерњи лист“.

Освен семејниот дом, Дино поседува и други недвижнини, меѓу кои и куќа во елитниот дел на Сараево, која ја издава на амбасадор на странска држава.

Според податоците на „Celebrity Net Worth“, Дино Мерлин е еден од најбогатите музичари на Балканот, со богатство проценето на 100 милиони долари (95,8 милиони евра). И покрај тоа, тој и понатаму живее во својот семеен дом во Сараево.

Во интервју за емисијата „Во свој филм“ на Хрватската радио телевизија во 2021 година, Дино зборуваше за еден од најтешките периоди во својот живот, кога се соочувал со депресија. Тој откри дека во тие моменти дури размислувал да се откаже од музиката.

„Имав сериозен здравствен проблем – тешка депресија, нешто што не би му го посакал ни на најголемиот непријател. Тоа ме направи неспособен за што било“, рече тој.

И покрај тешкотиите, Дино одлучил да продолжи со музиката. Во 2000 година го издаде албумот „Средином“, кој го смета за еден од своите најголеми успеси.

„Целосната посветеност, искреноста и храброста да експериментираш се клучни за успех. Никогаш нема да создадеш нешто извонредно ако не излезеш од зоната на комфорот,“ истакна тој.

Дино Мерлин, чие вистинско име е Един Дервишхалидовиќ, пораснал во скромно семејство. Татко му ја напуштил семејната куќа кога Дино имал само седум години, па тој и сестра му биле одгледани од мајка им. За да ѝ помогне финансиски, како млад почнал да работи.

Музичката кариера на Дино започнала во осумдесеттите години на минатиот век, со основањето на групата „Мерлин“, по што продолжил како соло изведувач под своето уметничко име. Денес, тој е еден од најголемите и највлијателните музички уметници на Балканот, со бројна публика која го поддржува и обожава.