Голем помор на птици-преселници се случил неделава во Њујорк, а активисти за заштита на животните велат дека силната бура која ја зафатила американската метропола на почетокот на неделава била главната причина за страдањето на илјадниците птици.

Мелиса Брајер од иницијативата Project Safe Flight, која го бележи патот на преселниците над Њујорк, вели дека собрала неколку стотици мртви птици за само два и пол часа.

Милиони птици од северните делови на САД и од Канада секоја година поминуваат над Њујорк на пат кон потоплите краишта, каде што презимуваат. Според активистите, бурата била важен фактор за последниот помор, но и дека птиците умираат во летот над градот и кога времето е убаво. Според нивните проценки, околу 230.000 птици угинуваат секоја година, удирајќи се во бројните њујоршки облакодери.