Во чест на починатиот писател, режисер и еден од најзначајните ликови во македонската култура, Горан Стефановски, Општина Центар во Дебар Маало го поставува споменикот кој пристигна во земјава.

Се наоѓа во паркот спроти бараките на општината, веднаш до чинарот, кој минатата година на роденденот на Стефановски – 27-ми април, беше засаден во знак на сеќавање на доајенот на македонската литература.

За жал, поради новите мерки, нема да има јавен настан за отворањето. Но, сигурно така и требало да биде, бидејќи Горан секогаш се враќаше во Скопје тивко и ненајавено – едноставно си сакаше да се појави (всушност, никогаш не се сметаше за отсутен). Така што, еве и овој пат, во текот на денот (здравје), Горан би требало да биде поставен на своето место, каде ќе ве чека за седенка и муабет. Кога ќе бидете во можност, отидете да го поздравите. ДОБРЕДОЈДЕ ДОМА СТАРИ! Едвај чекам да седнам до тебе пак…“, напиша Игор Стефановски, синот на Горан, во Фејсбук групата „Здружение за промоција на културното наследство на Горан Стефановски“.

Со појавата на Горан Стефановски современата македонска драма доживеа голем успех. Тој е автор на легендарните и популарни драми „Јане Задрогаз“, „Диво месо“, „Лет во место“, „Хај-Фај“, „Дупло дно“, „Тетовирани души“, „Црна дупка“, „Демонот од Дебар Маало“ и на најславната ТВ-серија во историјата на македонската продукција „Бушава азбука“. Почина во 2018 година, на 66 годишна возраст.