Загрозената џиновска желка од видот „келоноидис нигер портери“ (Chelonoidis niger porteri) на 100 години стана најстарата „прворотка“ од својот вид, откако нејзините први младенчиња се изведоа во зоолошката градина во Филаделфија, соопшти организацијата.

Женката Мами и мажјакот Абразо, наводно, се двајца од најстарите жители на зоолошката градина. Се верува дека се на возраст од околу 100 години, но точната возраст не е позната. Сепак, познато е дека Мами пристигнала на овие простори на 23 април 1932 година.

„Ова е значаен момент во историјата на зоолошката градина во Филаделфија и ние сме многу возбудени. Мами пристигна овде во 1932 година, што значи дека секој што нè посетил во последните 92 години сигурно ја видел. Нашата визија е да ја зголемиме популацијата на овие желки во следните 100 години“, изјавил Џо-Ел Могерман, претседател и директор на градината.

Според „Лајв санес“, желките и другите влекачи обично имаат способност да се размножуваат откако ќе достигнат зрелост. Не е познато колкав е просечниот животен век на видот овој вид желки, но има пример на единка која достигнала 171 година.

По парењето, Мами снела 16 јајца во ноември 2024 година, по што чуварите ги сместиле во инкубатори.

„Пред ова изведување на јајца, имаше само 44 од овие желки во американските зоолошки градини, така што ова е значајно за видот. Се надеваме дека можеме да го повториме овој успех, тимот во Филаделфија постигна нешто што мислевме дека е невозможно“, изјавила Ешли Ортега, координатор за овој тип на желки во Тексас.