В сабота од 21.00 часот на стадионот „Вембли“ во Лондон ќе се игра финалето во фудбалската Лига на шампионите помеѓу Реал Мадрид и Борусија Дортмунд.

Шпанскиот клуб ја има фаворитската улога, но тренерот на „Кралевите“ Карло Анчелоти не размислува така и дека неговите играчи треба максимално сериозно да го сфатат германскиот предизвик.

Сите погледи се насочени кон утрешниот дуел кој ќе го следи и поранешниот фудбалер на Реал, Герет Бејл.

Велшанецот нема дилеми околу тоа кој би требало да ја освои европската титула, дури и го прогнозира точниот резултат, 3:0 победа на Реал Мадрид.

– Сè уште го сакам Реал Мадрид, сè уште навивам за нив, исто како што правев кога бев млад. Ова никогаш нема да се промени. Целосно очекувам Реал Мадрид да го подигне трофејот во ЛШ. Ги разбираат притисоците и знаат што да очекуваат, што е голем плус – вели Бејл.

Во својата професионална кариера Бејл со Реал пет пати доаѓаше до пехарот во Лигата на шампионите.