Љубовта кон книгите ги споила Ендру и Марикруз, пар од Соединетите Американски Држави, кои од првиот бакнеж до венчалната заклетва, сѐ прославиле меѓу полици со книги, пренесе „Пипл“.

Додека престојувале во Хјустон, Ендру ја запросил својата сакана на едноставен, но магичен начин: во рака држел книга, а внатре сокрил писмо со прашање што го менува животот – „Ќе се омажиш ли за мене?“ Со кругови „да“ и „не“, како што се правело на матурските покани, ѝ го предал писмото, а таа со срце полно љубов одговорила потврдно.

„Книгите и читањето отсекогаш биле дел од нас. Како да ни беше судено сето ова да се случи вака“, раскажува Ендру.

Откако се преселиле во Масачусетс, почнале да размислуваат каде да ја одржат својата венчавка. Меѓу сите можности, една идеја блеснала посебно силно – јавната библиотека во Вотертаун. Иако не се изнајмува за приватни настани, библиотеката дозволува резервација на простории за посетители. Парот го искористил тоа правило и организирал скромна, но исклучително симболична церемонија меѓу книгите.

Темата на нивната венчавка била – добрина.

„Марикруз не е само прекрасна жена, таа е најемпатичното човечко суштество што сум го сретнал. Нејзината добрина ме учи да бидам подобар човек секој ден“, вели Ендру со топлина во гласот.

„А Ендру е оној што секогаш ќе помогне – на пријател, на роднина, па дури и на непознат. Таквата љубезност е ретка и скапоцена“, му возвраќа Марикруз.

Во разговорот таа им порача и на сите љубители на книги кои сѐ уште ја бараат љубовта: „Љубовта ќе ве најде. Можеби нема да знаете кога и каде, но ќе се случи – токму кога ќе ви треба најмногу“.

ФОТО | Романтичен гест: Момче ја запроси девојката со цитат сокриен во нејзината омилена книга